ភ្នំពេញ៖ នាយករដ្ឋមន្ត្រីសម្ដេចធិបតី ហ៊ុន ម៉ាណែត បានណែនាំឱ្យមានការជម្រើសក្នុងការរើសមន្ត្រីកិច្ចសន្យាដែលមានជំនាញក្នុងការមកជួយរដ្ឋាភិបាលដោយនឹងផ្ដល់ប្រាក់បៀវត្ស និងអត្ថប្រយោជន៍ ដោយថានឹងធ្វើឱ្យកម្ពុជាមានភាពបត់បែន និងបើកច្រកដល់មនុស្សជាច្រើនដើម្បីចួលរួមជួយសង្គមជាតិ។

ថ្លែងក្នុងពិធីប្រកាសជ័យលាភីអង្គភាពផ្តល់សេវាសាធារណ:គំរូក្នុងវិស័យអប់រំនិងសុខាភិបាល ឆ្នាំ២០២៣ នៅព្រឹកថ្ងៃទី២២ ខែកុម្ភៈ ឆ្នាំ២០២៤ នៅកោះពេជ្រ រាជធានីភ្នំពេញ សម្ដេចធិបតី ហ៊ុន ម៉ាណែត បានថ្លែងថា កម្ពុជាធ្លាប់ប្រើវិធីនេះបានជោគជ័យក្នុងអំឡុងពេលទទួលគ្រូពេទ្យក្នុងការប្រយុទ្ធប្រឆាំងជំងឺកូវីដ-១៩ កាលពីកន្លងទៅ។

សម្ដេចថា៖ «ប្រជាពលរដ្ឋខ្លះបងប្អូនខ្លះគាត់ចាប់ផ្ដើមដោយធ្វើការក្នុងវិស័យឯកជនតែដល់ពេលមួយគាត់ស្ម័គ្រចិត្តចូលមកបម្រើការងារជូនប្រជាពលរដ្ឋតែគាត់ហួសអាយុហើយតែមានជំនាញ។ តែគាត់ចង់ចូលយ៉ាងមិចព្រោះឥឡូវយើងពិបាកចូលណាស់បើចូលទាល់តែមានជាក្របខណ្ឌនយោបាយ ជាទីប្រឹក្សា ជាអនុរដ្ឋលេខាធិការ ឬក៏ជារដ្ឋលេខាធិការ តែបើយើងបើកក្របខណ្ឌបែបនេះគឺគាត់អាចចូលទៅក្នុងក្របខណ្ឌតែម្ដងជាមន្ត្រីដែលធ្វើការងារជំនាញតែម្ដង»។

សម្ដេចធិបតីបានថ្លែងបន្ថែមទៀតថា ការបំពេញការងារជាមន្ត្រីកិច្ចសន្យាជំនាញនេះគឺស្ថិតក្នុងកុងត្រា មានរយៈពេលច្បាស់លាស់ ដោយទុកសេរីភាពដល់មន្ត្រីទាំងនោះផងដែរ ខណៈប្រាក់បៀវត្ស និងអត្ថប្រយោជន៍ផ្សេងៗគឺត្រូវទទួលបានដូចមន្ត្រីរាជការផងដែរ៕